Blog Entry CONDEMN THE FILING OF FABRICATED CHARGES AGAINST ACTIVISTS! -statement ng ANAKBAYAN-Timog Katagalugan
KUNDENAHIN ANG PAGSASAMPA NG GAWAGAWANG KASO SA MGA AKTIBISTA, ILANTAD AT BIGUIN ANG OPLAN BANTAY LAYA II
Sukdulan na ang pasistang paghahari ng reaksyunaryong gubyerno ni Gloria Macapagal-Arroyo, kasapakat ang mga mersenaryong AFP-PNP-DND. Sa loob ng pitong taon mahigit na panunungkulan ng pekeng gubyernong ito, lalong tumitindi at hindi na masikmura ng taumbayan ang kalunos-lunos na kalagayan ng karapatang pantao sa bansa. Ayon sa tala ng Karapatan, isang grupo na nagsusulong sa karapatang pantao, sa ilalim ni Arroyo libo-libong kaso ng pagpaslang, pagdukot, pagtortyur, at iba pang paglabag sa karapatang pantao kasama na itong pakana na pagsasampa ng mga gawa-gawang kaso sa mga aktibista at kritiko ng rehimen.
Dahil natalo ng mamamayan ang unang parte ng Oplan Bantay Laya, kung saan pinapaslang ang mga aktibista, kasabay ng pagkalantad at pambabatikos ng buong mundo sa pasistang pamunuan ng rehimeng US-Arroyo, nagresulta ito sa taktika na pagsasampa ng mga gawa-gawang kaso sa mga aktibista, nauna na rito ang pagkakaso sa Batasan 5 at kay Prop. Jose Maria Sison.
Sa ating rehiyong Timog Katagalugan, mayroong 27 na kinasuhan ng arson, conspiracy to commit rebellion at mayroong 72 na kinasuhan ng murder at frustrated murder, na pawang wala namang basehan at puro kasinungalingan. Kasama sa mga kinasuhan ay ang pangkalahatang kalihim ng ANAKBAYAN Timog Katagalugan (ANAKBAYAN-TK) na si kasamang PJ Santos, at ilan pang mga lider ng mga progresibong organisasyon sa rehiyon.
Kinukundena ng ANAKBAYAN-TK sa pinakamataas na antas ang ganitong desperadong hakbangin ng rehimeng US-Arroyo upang patahimikin ang mga progresibong organisasyon na ang panawagan lang naman ay mga batayang karapatan: edukasyon para sa lahat, pabahay sa mga maralita, dagdag na sahod sa mga manggagawa at lupa sa mga magsasaka.
Tinuturing ng rehimeng US-Arroyo na isang krimen ang pagpapanawagan sa mga batayang karapatan, samantalang pinoprotektahan ang mga tunay na kriminal, at burukrata kapitalista katulad ni Jocjoc Bolante na nagnakaw ng 728 milyong pondo ng abono na ginamit sa eleksyon ng mga kasapakat ng administrasyon nitong si Arroyo. Pinatunayan lamang ng ganitong kalakaran ang kawalan ng hustisyang panlipunan sa ilalim ng reaksyunaryong gubyernong ito.
Kung kaya may pangangailangan sa hanay ng kabataan na makipagkaisa sa malawak pang masang anakpawis na ilantad at kundenahin ang pampulitikang panunupil ng rehimeng US-Arroyo. Gayundin ang panwagan na ang dapat ikulong ay ang mga magnanakaw at kriminal katulad nina Bolante at Arroyo, hindi ang mga aktibista.
Nabigo na natin ang Oplan Bantay Laya I, muli, bibiguin natin itong Oplan Bantay Laya II. Kailangan ng wakasan ang pasistang diktadurya ng rehimeng US-Arroyo, at itayo ang isang lipunang kumikilala sa karapatang pantao at nagsusulong sa interes ng sambayanang pilipino.
Itigil ang pampulitikang panunupil!
Ikulong ang mga Kriminal, hindi ang mga aktibista!
Patalsikin ang pasistang rehimeng US-Arroyo!
Kamtin ang hustisyang panlipunan!
Tags: Blog Entry CONDEMN THE FILING OF FABRICATED CHARGES AGA
